馬國明暗示失落視帝10次　心灰意冷欲離巢：都好想拍下出面啲嘢

馬國明今晚（9/1）現身北角出席懷舊派對活動。提到《萬千星輝頒獎典禮2019》即將舉行，奪取視帝寶座高唱入雲，馬明就話：「好難講，因為有好多強勁嘅對手，例如有《鐵探》嘅袁偉豪，又有王浩信嘅《解決師》，其實佢台慶檔期播都有少少著數，因為記憶好新，所以今年好難估男視帝會係邊個，我都係平常心。」

馬明跟無綫經理人合約今年即將屆滿，有指他好友鄭家穎充當決策軍師，出招教馬明用合約換取視帝獎項，所以馬明遲遲未動筆簽字落實。對此馬明接受《香港01》訪問時說：「其實合約仲有段時間，斷斷續續都仲傾緊，因為仲有好多嘢要考慮，覺得呢個時勢好似好亂，所以有好多嘢大家都要傾清楚，都明白呢個時勢好難話要加片酬，反而係想睇下嚟近會有啲咩機會，又或者啲空間再去做，始終我都做咗好多年，有好多嘢要去睇，唔係純粹向錢看，其實自己都好想拍下出面啲嘢，相信係每個演員所期望，至於話嘉穎指點我單嘢，冇啲咁嘅事，個單新聞流流地，佢呢排掛住湊仔，唔得閒理我哋。」

馬國明同黃心穎雖然變回好朋友，但他依然有關心舊愛，雖然心穎仍然有被網民狙擊，但馬明叫大家都支持一下《丫鬟大聯盟》《黃金有罪》兩套新劇，他說：「（有冇見過心穎呀 ）未有機會，（抗唔抗拒見面？）其實我冇乜所謂架，我都有send訊息畀佢嘅，聖誕快樂嗰啲囉，始終都係朋友嚟嘅，大家唔好誤會好有仇恨嗰啲，完全冇嘅，近排丫鬟（劇集《丫鬟大聯盟》）我都有睇，我覺得幾好睇喎，輕輕鬆鬆幾好。」