【先拔頭籌】港男互選楊灌澤贏友誼先生：學好中文跟參賽者溝通

《2016香港先生選舉》舉行在即，十位準香港先生近日頻頻亮相，今午他們就互選友誼先生，最後該獎項就由7號楊灌澤(Christian)奪得。另外，出名轉數高的農夫將會孖住Do姐做主持。

至於首次擔任港姐及港男司儀的農夫，一出場當然大放笑彈，更大爆經常同do姐一齊「睇仔」，C君笑言：「唯獨聽過do姐讚過洪永城係靚仔，所以大眼雙眼皮個類型麻麻。」至於他們心目中的香港先生，陸永指自己對做過消防員的Flow有深刻印象：「因為消防員係好討好的職業，我好想俾佢救。」

楊灌澤(Christian)指可以拎到友誼先生獎項，是因為與每位參賽者有傾計：「一直都好努力學中文和其他參賽者溝通。Fei(胡㻗)、Alex(麥凱程)，可能大家母語都不是廣東話，但大家都好努力學習中文。」而決賽當晚，Christian就指將表演拉丁舞。

而近日有報導指早前曾參加ViuTv節目《脫毒工程》，被指是食兩家茶禮的梁裕恆(Flow)，他表示一早向TVB申報：「節目是5月初拍攝的。（當時已辭去消防員一職？）還未，但有申報上去。但過程有點繁複，所以最後係無收錢拍。」其後問到如果決賽當晚拎唔到任何獎項，會有什麼打算？Flow表示會繼續教健身：「我一向都教健身。(收入比消防員少？)其實是會多一點的。」