【玩味濃】張敬軒王菀之紅館開騷　未合體先互窒　

張敬軒（軒仔）和王菀之（Ivana）這對好拍檔由出道至今一直有不少合作機會，今次兩人攜手於明年2月16至18日在紅館舉行命名為《The Magical Teeter Totter演唱會2017》。軒仔指他們相處就好像一齊玩搖搖板，一時鬥咀、一時互攬；Ivana則表示他們一高一矮；一肥一瘦；一黑一白，加埋就是好完美絕配！不過合體紅館舉行演唱會還是第一次。

買餸煮飯仔傾心事

兩人相識多年，默契十足，今次的演唱會海報他們決定要玩味濃，以「巨人與小人」為主題，拍攝時他們不時交換角色，非常好玩。舞台上Ivana與軒仔是合作無間，私底下也是非常要好的朋友，Ivana透露他們經常約埋買餸煮飯仔傾心事，軒仔即笑說：「買餸是你同蘇生做的！」Ivana偷笑。當軒仔表示二人關係就如最佳拍檔時，Ivana即煞有介事地說：「我哋冇嘢㗎！」軒仔哈哈大笑說：「我哋芥蒂就有好多！」

兩人不停互窒整蠱
 
服裝方面設計師特別安排兩人穿情侶間條睡衣，又在布景的迷你牀上玩打交又互窒，軒仔被Ivana激到要除拖鞋掟她，她就立即躲避，令現場充滿笑聲。其中軒仔穿上一件花碌碌中褸，頭戴紳士高帽，他笑對Ivana說：「我這個造型好靚，件褸有500朶非洲菊做，真是好似開菊展咁呀！」Ivana則笑軒仔是谷氣才真！Ivana表示，他們的巨人和小人的角色是會交換來拍攝，她自覺是飾演平日輕盈的她一樣。軒仔卻反問Ivana：「乜你真係覺得自己好輕盈？！」Ivana自滿的說：「我係Fit咗！」雖然他們不停互相整蠱和互窒，不過那份默契，又確是難得。