王君馨打得又煮得 自製真．西瓜蛋糕賀G.E.M.生日
撰文：郭敏玲
出版：更新：
講到近期熱爆電視劇《城寨英雄》，每個角色的造型都精心雕琢，特別是王君馨（Grace）飾演的花曼，身穿貼身連身裙，突顯Grace苦練有功的20.5吋S型蛇腰，再加上她那超過180度的朝天腳，好腰好腳好身手，名副其實是性感尤物，儼如從漫畫走出來的人物，甚至勁過經典遊戲「街霸」裡的設定，令網民每晚放工都要準時回家收睇花曼的誘人演出。
手起刀落 有板有眼
不過，王君馨除了睇得打得，其實她都有柔情、賢淑的一面，就如昨天她在社交平台上載了一段短片，原來Grace為了慶祝好友鄧紫棋（G.E.M.）生日，特意用真﹒西瓜製作蛋糕，讓對方大感驚喜。Grace在片中拿起菜刀，將西瓜切片，然後小心翼翼去皮，弄成蛋糕大小及形狀，過程盡顯功架。雖然Grace在片中跟阿G.E.M.表示用了6小時製作這個蛋糕，又要切西瓜，又要打發忌廉，但想不到Grace除了擅長赤手空拳對敵之外，原來拿起「架生」也駕輕就熟，難怪她也沾沾自喜地說：「唔好以為花曼淨係出得廳堂唔入得廚房！」當然要寫個服字啦！