《烈火雄心3》後播《鬥氣一族》　吳君如周星馳首次合作驚喜無限

無綫喺深宵時段重播多套經典劇集，《烈火雄心3》將會下月初迎來大結局。而緊接《烈3》，據知將會周星馳、吳君如主演嘅《鬥氣一族》！劇集講述周星馳飾演嘅鄧家發，自小已跟隨爸爸（夏雨）喺街市開檔賣雞，性格粗豪兼好賭。不時因小事同鄰居陳初一 (吳君如) 有爭執，性人男人婆嘅陳初一同鄧家發好似前世撈亂骨頭一樣，一見面就不停互串，非常搞笑。

吳君如同周星馳分別於80年代加入無綫，而吳君如早在《鬥氣一族》前，已憑《霸王花》成為新笑旦。同周星馳喺《鬥》算係第一次正式交手，一個係雜貨舖當家、一個雞檔太子爺，意外地合拍。二人之後轉戰影壇，於《流氓差婆》、《賭聖》、《無敵幸運星》、《望夫成龍》繼續大放笑彈。值得一提，《鬥氣一族》由陳寶華編劇、曾勵珍監製。陳寶華多年來打造不少膾炙人口的作品如《真情》、《再見亦是老婆》、《妙手仁心2》，去年選擇以《多功能老婆》重返無綫。