蔡思貝做姐妹感動到喊　醉心工作未理會余德丞周秀娜緋聞

蔡思貝好友許芷熒（Whitney）與拍拖兩年半圈外男友Alexander Fung共諧連理，於尖沙咀舉行盛大婚宴，思貝更擔任婚禮姊妹：「今次係我正式第一次做姊妹，親身體會整個傳統結婚儀式，當Whitney與Alexander 雙方父母講完一啲祝福嘅說話，一對新人情深互望住對方，讀出愛的誓言個一刻時，喺我腦海裡即刻浮現出，我同Whitney識於微時嘅時候片段，兩個人傻更更咁嘅畫面，終忍唔住喊咗出嚟，真係好戥佢開心。」

至於幾時結婚，思貝就話：「自己從來都冇諗過，呢一刻我好醉心於工作同拍劇之上，我喺拍劇同做演員嘅生涯當中，得到好多幸福，得到好多快樂，咁所以呢一刻我真係冇諗過幾時會結婚，但我好相信right timing嘅時候，唔需要去強求呢個人會出現啦，又或者我嘅婚禮會出現。」對於近日有傳緋聞男友余德丞與娜姐（周秀娜）秘撻，思貝表示未有留意相關報導。