【包青天再起風雲】不捨梁舜燕離世　胡定欣眼濕濕：佢真係上等人

「上等人」梁舜燕（Lily姐）日前因病離世，享年90歲。除了香港觀眾不捨，與她多次合作的胡定欣亦感到依依不捨：「前幾日啱啱聽到係好突然，因為我對上一次見佢已經係拍《包青天》，同埋上年佢嘅生日，佢都係好健康好開心。同Lily姐有好多回憶，最深刻就係《城寨英雄》入面佢做嫲嫲。」她又回憶初入行時，就已經與對方合作：「初入行嘅時候，拍嘅《牛郎織女》，我係有份做仙女，而Lily姐就係做一個好高級嘅神仙（王母）。我仲好記得有一張相係我隔籬嘅就係佢。」

問Lily姐給她的最大印象？胡定欣回答：「佢真係『上等人』，佢好客氣好高貴。上年生日嘅時候睇過佢做報道員嘅相，衣着打扮，舉止真係好高貴。」除了Lily姐的外在，原來最令胡定欣佩服的是，她的敬業樂業精神：「拍《包青天》嘅時候，佢凌晨2、3點都開工，唔怕辛苦。有一次我問：『Lily姐，你攰唔攰吖？』佢話：『
唔攰，唔攰。』我問：『點解你去到呢個時候都願意拍戲？』佢話：『我真係太鍾意，所以我好想拍，唔怕辛苦。』」