綵排《但願人長久》多掌摑戲 江美儀自嘲面皮薄：準備啲冰敷面！
撰文：吳子生
出版：更新：
江美儀今日（6/8）出席舞台劇《但願人長久》記者會。美儀提到劇中飾演一名「巴渣婆」，與對手有連番激鬧，有多場互摑場口，可以話真係摑到手痛：「其實最擔心真係會打親對手，因為喺打嘅時候，係冇規定打幾多下，係打到當時嘅情緒覺得夠嘅時候就要停，有難道嘅地方就真係驚打親人哋，咁當然我都要俾對方打，都要受佢摑十巴，自己塊面又薄，我又驚好瘀，咁所以會準備定啲冰用來敷臉，用來鎮靜下唔好咁傷。」
美儀透露問準導演許可，每次排戲必定攜帶兩隻愛犬陪開工：「因為寵物係我嘅陪伴，去到邊我都會帶住佢哋，佢哋兩個都好生性，當有啲場口我鬧人，又或者我俾人打，佢哋兩個即刻好緊張，會警覺性好高，當我安撫佢哋兩個嘅時候，佢哋會冷靜咗落嚟，其實養寵物都幾窩心，養寵物嗰啲人就會知道。」