【晚吹】黎紀君初嚐戀愛　Daddy嚴厲警告：有啲嘢唔可以做

黎紀君（Christy）今日（30/7）亮相ViuTV《晚吹女學生吹水班》，為節目進行錄影拍攝工作。本身就讀女校的Christy，每逢等到聯校活動的時候，眾女生都表現的瘋狂又緊張，因為可以趁機會可以接觸到校外的男生：「有時候學校都會搞聯校歌唱比賽，咁所以我哋主要接觸到一啲唱歌好叻嘅男仔，而且當時有一位就係我嘅初戀男朋友，因為當時被佢嘅歌聲所吸引住，時隔十年，宜家都仲記得同佢相處嘅時候一啲點滴，雖然宜家冇再一齊，但大家都仲有聯絡。」

Christy透露拍第一次拖的時候，心驚膽跳：「因為我屋企家教都好嚴，但我同媽咪溝通咗之後，媽咪就吩咐我唔好掛住拍拖影響學業，而Daddy就叫我有啲嘢唔好做，同我講唔好信啲男仔，咁所以我就唔會墮入呢啲圈套，因為年紀比較少只得16歲，咁所以乜都冇做，只係拍下拖囉，哈哈。」