孫慧雪新書寫真首面世 散文集內容最動人
撰文：吳子生
出版：更新：
孫慧雪（阿雪）今日（12/7）現身銅鑼灣出席新書簽名會，現場吸引大批粉絲手持寫真、散文集排隊等攞簽名。對於新書面世阿雪讚不絕口：「我都係啱啱先睇到本書，其實有啲相我之前係睇過，都忍唔住Post咗出嚟，但有啲相真係好性感嘅相，但我老公（羅天彥）一啲都唔覺得我好性感，仲話我都唔明啲人點解會覺得我性感，原來我老公一向覺得我好保守，哈哈！」
至於另一本散文集《那個願沒有圓》，原來背後隱藏着了一個動人故事。阿雪坦言說：「記得婚前之前，經醫生確診患有腺肌症，當時個腺肌瘤有成8cm大，每個月會大1cm，仲要壓住我條脊骨，當時醫生話如果諗住唔生小朋友，就可以選擇成個子宮切除，嗰陣時係我人生最唔開心嘅時候，之後仲要患上抑鬱症，當時我老公同我講無論有冇小朋友都好，都會話同我結婚，就係嗰一刻好感動，我哋先結婚。婚後好幸運，我可以有我嘅小朋友，之所以我寫呢本書，其實係好想去鼓勵大家，當大家以為冇希望嘅嘢其實未必係。」