【杜汶澤程美段】拖量事件互片　莊端兒：如果拖我直踩黃竹坑追

曾為無綫節目《美女廚房》擔任美女學徒程美段，日前向記者爆出被杜汶澤拖欠薪金，事後兩人在社交平台隔空駁火，互數不是。莊端兒今日（30/4）出席活動時表示：「雖然我有幫阿澤（杜汶澤）打過工，拖糧未發生過喺我身上，因為其實我又準時出糧，第一佢無乜拖過我糧，我哋又合作好愉快，咁所以唔方便批評。」

（有冇講明幾時出糧）端兒直言：「其實我哋呢一行真係冇講實幾時出得糧嘅日期，但係好似我咁3月做完嘢，月尾我就會問直接問豪仔：『我張票準備好未呀』，豪仔都會即時覆我，通常佢哋都準備咗。」（發生係你身上點處理？）端兒表示：「我第一時間即刻瘋狂搵豪仔先嘅，如果搵唔到佢我會上門搵，直踩上黃竹坑，唔會Whatsapp㗎，咁佢一定會見到我嘅，如果搞唔點咪搵杜先生（杜汶澤），我又唔係冇佢電話。」