梁家輝為《寒戰2》戲院謝票　陸劍青：寫緊第3集望再同發哥合作

近期最hit，莫過於港產電影《寒戰2》。有「民間特首」周潤發（發哥）微服出巡排除買票捧自己場，這股風潮吹得更烈。今日又再有好消息，上映僅9日，票房已經突破4,000萬，更超越了《寒戰》的總票房記錄，實在是近年香港電影界的福音！

有見及此，戲中飾演「李Sir」的梁家輝及導演陸劍青到奧海城謝票，答謝觀眾對《寒戰2》的支持。兩人對於電影如此叫好叫座，感到非常高興，家輝表示：「當然開心，但導演其實就有好大壓力，因為又有第一集，反應又咁好，想再下一城，不過有如此好的反應，都好滿意。」

提到電影陣容非常強大，集結了不同時代不同類型的演員，令觀眾有驚喜，家輝就話：「未算㗎！四大天王都未出嚟！下次拍第3輯我會再打電話畀佢哋邀請！（發哥話佢要暫別影壇，會唔會參與唔到第3輯？）發哥好醒㗎，佢去叉一叉電半年，半年就會自動埋位㗎啦！等佢呢半年好好休養生息啦！」至於導演陸劍青就保守表示：「寫緊第3集，希望有機會再同發哥合作！」