【抖音】28歲內地男網紅用牙膏畫畫　一熄燈震撼2300萬網民

最近喺非常之受歡迎嘅網上直播平台《抖音》（內地版）又孕育咗一位直播神人，每條片都起碼有6位數字嘅瀏覽次數，而粉絲數目亦超過60萬，其中一幅仲超過2300萬！到底呢位嚟自大連嘅90後李益達有咩咁利害？

「牙膏畫」熄燈一刻瞬間變化

李益達本身從事金融行業，最近不斷咁用牙膏作顏料喺廁所塊鏡度畫畫，現時已超過160件「牙膏畫」。其實以牙膏作為顏料喺塊鏡上面畫畫，係要熄燈先睇得到！因為個原理就係要廁所全黑，透過廁所門外嘅光折射落鏡面反射出嚟先會見到畫作成品，所以李益達每次拍片都會影住閂燈的一刻，見到鏡上嘅牙膏喺熄燈一刻瞬間嘅變化，每次都震撼數十萬網民！而李益達以「知名人士」為主題，畫過周星馳、李小龍、迪麗熱巴、NBA球星高比拜仁等，所有都為肖為妙，而且李益達仲會回應網友嘅要求添！