【多圖】單立文正式「登六」　凍齡有術點睇都唔似60歲

單立文（豹哥）正式「登六」( 60歲)，「豹嫂」胡蓓蔚為佢舉行生日會，《愛·回家之開心速遞》嘅劉丹﹑呂慧儀﹑張景淳﹑湯盈盈等人，以及由出道就已經有合作嘅蔡卓妍亦有出席，而喺蘇韻姿上載嘅片段所見，以白馬王子造型出席生日會嘅豹哥同來賓跳勁舞兼滿場飛，又攬實豹嫂胡蓓蔚錫錫兼一齊切蛋糕，心情大靚，唔少網民都留言祝豹哥生日快樂，並表示非常羨慕，因為豹哥無論係樣貌和心境上，點睇都唔係60歲。

到底豹哥有何凍齡秘訣呢？他接受訪問時表示年齡只係一個數字，故此對60歲並沒有任何感覺。「可能係因為我工作、家庭都無乜擔憂，工作上亦都有好嘅對手，所以每日開工都係好快樂，其實保持童心係好重要，阿叔呢個角色無論係心境或背景都同我好似，當初拍嗰陣因為自己又拍緊《乘勝狙擊》同《踩過界》，角色都比較沉重，所以會有少少擔心可唔可以做到阿叔，但珍姐（曾勵珍）覺得我可以嘅，好多謝佢比信心我。」豹哥笑言做咗「阿叔」後，不時都有路人跟他打招呼，而小朋友亦都唔怕佢，有時就連駕車時，都有警察同自己打招呼，令他感覺十分開心，亦更珍惜「阿叔」一角。

除了心境外，豹哥在飲食方面雖然想食得就食，但由於有老婆胡蓓蔚嚴控，所以也食得非常健康。「好似之前過年食得太多，到呢排出街嗰幾集都面腫腫，佢就係咁話，叫我好好檢討下，依家要食營養餐急減。」到底係肥咗幾多搞到要檢討呢？豹哥輕嘆一聲後，表示半個月內肥了近10磅，難怪會遭老婆詐型。豹哥透露，在飲食方面，基本上用一半豐富一半清淡，不會刻意食少啲。「心境真係好重要，香港人太部分都好大壓力，大家睇多啲阿叔開心下啦。」咁萬一阿叔有壓力時，又會點解決呢？豹哥話會靠聽音樂減壓。「因為細細個就已經好鍾意音樂，除咗可令自己放鬆外，亦會啟發我好多嘢。」豹哥透露大概兩至三年才會進行身體檢查，對上一次檢查時發現膽固醇略高，不過醫生認為已他的年齡來說，已算不錯。其實除咗心境之外，相信衣著打扮亦是豹哥凍齡的最大秘訣。「自己不嬲都貪靚，同埋做藝人都應該有呢種特性，再加上身為藝人應該要有要求、自律性，如果我60歲都可以做到咁的話，應該好多人都可以做到咁。」