黃宗澤重回兒時成長地　與沙角邨冬菇亭街市檔主留影：有緣再聚！

屋邨生活應該係唔少香港人嘅集體回憶，舊式公屋長長嘅走廊，成為小朋友追逐玩樂嘅天地，鄰里間守望相助，一切都隨住活化社區、收購清拆等工程，只能成為回憶。觀塘裕民坊不敵時代巨輪正在清場，而沙田圍沙角邨亦正式進行翻新工程，喺呢條邨長大嘅黃宗澤亦趁最後機會重遊舊地，同一班老街坊影相留念，不勝唏噓。

唔少香港藝人都喺屋邨長大，Bosco黃宗澤得知兒時住處嘅冬菇亭熟食檔以及街市準備關閉翻新，特意於拍攝空檔重返沙田圍沙角邨，上載多張照片並留言話：「沙角邨，我從小長大的地方，現在也會常去買餸的街市，時代變遷終於曲終人散，十分不捨，萬分可惜，謝謝各位多年嘅照顧！各位老友記...有緣再聚！」