【流行經典50年】容羨媛亮相「我不是歌手」　感激陳敏之幫忙

《東張西望》主持容羨媛昨日（10日）亮相《流行經典50年》，參與「我不是歌手」的部分，表演歌舞。她表示以往這部分的表演嘉賓主要選擇慢歌演唱，但她這次選了陳慧嫻的《跳舞街》這首經典的流行快歌去表演，原來她為了給觀眾新鮮感，「不嬲做開主持嘅我比觀眾嘅感覺都係比較正經同埋靜態，所以今次嘅演出希望可以令到網民同觀眾都對我另眼相看。」

而容羨媛也特別感謝《流行經典50年》主持之一的陳敏之，她說︰「特別多謝陳敏之喺過程當中佢幫咗我好多，無論係精神上定係其他方面，因為第一次有呢個環節嘅時候我已經好想上去，經過咗大半年多番努力之後，終於有機會，但係準備時間只係得一個星期，所以當時真係壓力爆煲，因為咁辛苦能夠上去真係唔想失禮！」

容羨媛回憶上台一刻非常感動，「尤其係見到老公同埋自己嘅朋友揸住燈牌支持自己，但係我仍然強忍淚水，希望將自己最好嘅發揮晒出嚟！」而她很高興得到觀眾的正面評價，對她充滿鼓勵，她也寄望豬年能作出更多新的嘗試和發展。