【如珠如寶】新年老婆帶幾個女飛去日本滑雪　阿Bob：我好唔開心

由林敏驄執導新年賀歲電影《如珠如寶》今晚（29/1）在又一城舉行群星首映禮。有份參演的阿Bob表示對電影在賀歲檔的表現非常期待：「我之前聽咗好多幕後同事講話睇咗好多賀歲片，都係胡胡鬧鬧，而呢一套感動嗰喎，都好感人，因為我哋拍嘅時候知道有啲位都幾催淚，希望一陣入去睇，可以睇到感動嘅一面啦！」

每逢農曆新年，阿Bob密密接騷做司儀，今年亦唔例外：「好感恩，新年有嘢做，年初二要做煙花現場司儀，初三會過澳門做花車巡遊司儀，跟住初六、七都會做相關嘅嘢，都會有時間去拜年，但屋企人就開心啦，太太帶埋幾個女去日本滑雪，冇我份好唔開心，我冇理由有兩日時間都飛過去㗎咁無聊，所以睇下暑假有冇時間，到時再去遠啲嘅地方去玩過夠本啦！」