黃心穎30歲生日開校服派對　馬國明超齡學生Look男主人身份現身

細個嘅時候好想快啲長大，唔使再做功課唔使再面對考試。但到真正長大後，好多時都會懷念起校園青蔥歲月。眨下眼黃心穎已經入行超過6年，聽日（1月23日）就係佢30歲生日，連日來切蛋糕切到手軟，呢日仲有一大班圈中好友同佢開校服派對，男友馬國明都有出席，企正喺壽星女身邊似足男主人呀！

心穎性格爽直，入行以來同佢合作過嘅好多都變成朋友，呢日校服派對陣容相當強勁，高海寧、湯洛雯、麥美恩、朱千雪、趙希洛、岑杏賢、莊思明、楊明、何雁詩、王子涵、張振朗同李霖恩，個個跟足Dress Code着上藍白色調校服出席。 心穎紮孖辮滿場飛不停同大家自拍，一眾TVB花旦齊齊變做學生妹，Pose相當青春可人，大家又覺得邊個最吸睛呢？

不過一眾靚女都唔夠壽星女男友馬國明搶鏡，人人着白色藍色，馬明就着上紅色冷衫戴埋幅眼鏡，橫睇掂睇都成個周星星同學咁，超齡學生喎！見佢大方企喺心穎旁邊成個男主人咁款，難怪壽星女笑得咁甜啦。心穎上載大合照話：「多謝校友for throwing this birthday party for me! 好多校花校草呀！ many more pix to come.」唔知生日正日，馬明又準備咗咩驚喜俾佢呢？