被指「造獎論」暗嘲菊梓喬未夠班　吳若希︰如有得罪純屬你小器

TVB《勁歌金曲頒獎禮2018》已經圓滿落幕，所有獎項都已經塵埃落定，但是非就仲未有停嘅跡象。當晚菊梓喬（Hana）首奪「最受歡迎女歌星」，更係繼容祖兒後第二位80後奪得呢個獎項。不過當晚坐喺Hana隔離嘅同門師姐吳若希，反而成為網友焦點，由宣佈得獎瘋狂大笑13秒，到頒獎禮後訪問中講嘅「造獎論」都被放大討論，呢日佢本人就親自回應啦。

勁歌當晚星夢歌手幾乎人人有獎，Hana更成為大贏家。同門師姐吳若希一直被指同Hana不和，爭公司一姐之位。頒獎禮後吳若希被問到菊梓喬奪得大獎有咩睇法，講咗句：「造俾佢都應該，係自己公司人。」被外界解讀為不屑造馬賽果。呢日吳若希就喺Facebook留言話：「所有嘢，我都係特登諗過先講既，亦都唔覺得得罪人。如有得罪，純屬你小器﹗我會繼續講我覺得應該講既嘢，多謝！」到底佢話邊位小氣呢？睇嚟下次現身做訪問又要解畫啦。