鄭希怡帶囡囡梁浸浸現身警署　容祖兒關智斌助出重酬尋失物

鄭希怡嘅囡囡梁浸浸，天生曲髮相當可愛，自出世起已經風靡唔少星級UNCLE AUNTIE，容祖兒謝霆鋒TWINS等錫到佢燶，媽媽YUMIKO都樂於帶住個女周圍去周圍玩。點知呢日兩母女忽然去到警署，又唔係學校去參觀，到底咩事呢？

時間線要推返去5日前，大家都知容祖兒出名大頭蝦，電話銀包跌過無數次，原來Yumiko都不遑多讓，佢喺IG上載一個桃紅色銀包相片，留言話：「遺失銀包一個，有人執到嗎？可以要返d卡嗎？無限感激。」網友紛紛留言問線索，但Yumiko對自己幾時邊度遺失都毫無頭緒，網友不禁笑問：「究竟有無拎出街？不如問下浸浸姐先。」關智斌容祖兒都出力呼籲，Kenny話出一千蚊重酬，Joey居然話送出「謝霆鋒豬扒包一個」相當有創意。

大家可能諗，唔見咗呢個名牌銀包，搵到機會都應該好微啦，但Yumiko就帶來好消息：「奇蹟出現了！收到銀行電話，遺失的已在警署，多謝好心人。萬分感謝，想多謝個好心人，警察說那是不能說的秘密。獎金不知如何比你，因為關智斌話會重酬你，容祖兒會請你食謝霆鋒豬扒包，就係成日都賣曬嗰個包。」Yumiko仲笑言搵返銀包都不及梁浸浸開心：「亞浸都好開心，終於有得去police station，佢話呢度係警察的屋企，係咪有床架，夜晚係咪一齊訓係度，下刪100個問題……」