楊千嬅朱晨麗撐陳煒做視后　周柏豪甘做太監「Spring Pocket」

萬千星輝頒獎典禮將會喺12月16日晚上舉行，今年最佳女主角被視為黃智雯、李佳芯及陳煒三人之爭，戰況相當激烈，當中又以黃智雯早前奪新加坡及馬來西亞雙料視后，被網友睇高一線。話晒陳煒喺《宮心計2深宮計》中太平公主一角都深得民心，呢日佢都出招拍片拉票啦﹗

煒哥早兩日同劇集《多功能老婆》嘅拍檔楊千嬅、周柏豪食飯聚舊，順便為12月2號生日嘅朱晨麗慶祝生日。飲飽食醉唱完生日歌兼切蛋糕後，佢地一時興起戲精上身，扮鬼扮馬拍片幫太平公主拉票。千嬅飾演春嬌，朱朱飾演春朱，柏豪都跟大隊做「春字輩」，不過改咗做英文，叫Spring Pocket。

片段一開始煒哥就太平公主上身坐喺度，千嬅入鏡遞上餐牌問太平公主︰「想食乜嘢？」但就被霸氣反問︰「春嬌我教咗你，行禮係咁行嘅咩？」朱朱飛身入鏡又被鬧︰「壓死我啦春朱，你以為我係皇帝，你色誘我係咪呀！冇心情食嘢呀。」最後千嬅叫小鮮肉太監柏豪入嚟侍候：「叫啲人投你（陳煒）票囉，投《萬千星輝》...」話口未完，千嬅朱朱就搶答︰「投最佳女主角。」最後幾位笑到攬埋一齊，真係相當老友呀。