汪明荃掀長者開IG熱潮　今次輪到呢位60歲潮人加入

近排又多咗藝人開IG喇，繼汪阿姐、司棋姐開通Account 之後，男神三哥苗僑偉都呢兩日都開咗IG帳戶，其實今年60歲嘅三哥不嬲都有玩開微博，依家開埋IG，大家又多個渠道了解三哥喇。因為只係開咗兩三日，三哥頭兩個IG posts 係同一對仔女嘅合照，同埋細仔苗俊大學畢業照，竟然唔見三嫂戚美珍喎！唔知三嫂會唔會mind 呢？

其實三哥本身都不太活躍於網絡，不過上月就稍為出多幾個posts，可能係因為佢有份主演的中港合拍新劇《守護神之保險調查》即將出街，但香港呢邊完全零宣傳，所以三哥要自己開埋IG，自己宣傳新劇。呢套劇係邵氏同愛奇藝網站首次合作拍攝製作，將於本月6日喺愛奇藝首播，香港方面則會喺myTV SUPER同步播放，想免費睇就要等到12月24日，先喺翡翠台播出。