張栢芝傳誕下第三胎後首次露面　帶Quintus出遊似唔似坐緊月？

早兩日忽然傳出張栢芝再做媽媽，秘密產下第三胎，震驚娛樂圈。不過由頭到尾都無人影到栢芝大肚，佢身邊好友亦紛紛表示唔知情，到底栢芝係咪剛生完BB坐緊月，真係一個謎。呢日終於有栢芝新相流出，大家又不如睇下覺得佢似唔似剛生完BB？

由於栢芝於8月份將IG所有相片全部刪除，大家想知栢芝近況只能從佢嘅朋友們著手。近幾日圈中同栢芝相熟嘅朋友們，都俾傳媒瘋狂追問生B呢件事，12月2號終於有人上載栢芝最新照片。飲食作家兼主持Bonnie上載同栢芝以及Quintus兩張合照，留言話：「今日小朋友遊樂日又撞到好姊妹Ceci，Quintus愈嚟愈高大靚仔呀﹗」

見到相片中栢芝著上紅色中袖上衣，放低一頭秀髮戴上太陽眼鏡，睇落精神相當唔錯，依舊面尖尖，對住鏡頭擺出V字手勢。Bonnie有打卡顯示地點於深灣遊艇會，二人手上都有紫紅色手帶，分別帶同小朋友到場參加會員日活動。Bonnie接受訪問時表示，無向栢芝求証係咪生咗第3胎，眼見佢手腳依舊纖幼行動自如，加上坐月應該唔會走出戶外吹風，相信一切只屬傳聞並非事實。

其後Bonnie留言話：「各位傳媒，post哩張相係得到當時人嘅同意，手上嘅紫色手帶亦係最好嘅証明，張相係尋日(12月1日)AMC member’s day影嘅。其他嘅嘢都講晒亦無嘢要補充，要問就問峻當時人啦，唔該晒。」