【萬千星輝】眾望所歸奪視后　李佳芯：攞唔到啲同事會好失望！

李佳芯（Ali）及袁偉豪（Ben）今日（2日）出席商場揭幕禮，二人在台上互相比拼，各自幫一位粉絲化妝及打扮，結果Ali壓倒性勝出。她坦言其實自己從來沒有幫過自己以外的人化妝：「我連自己化自己都未化得好好，所以我要化妝師同髮型師幫我，更何況要幫人呢，費事嚇親人啦！（覺得自己化妝技巧唔好？）我覺得我有更大嘅進步空間，哈哈！」

臨近聖誕，有沒有買聖誕禮物慰勞自己？Ali說最近買了一個史上最貴重的禮物給自己：「其實我好少買貴嘢畀自己㗎，我就安慰自己算啦咁多年咁辛苦搵錢我都無乜買嘢畀自己，所以好捨得咁買咗個手袋！」Ali說自己不打算買禮物給父母，覺得送錢最實際：「我買親嘢媽咪都會話我買埋囇啲唔等使嘅嘢畀佢啦，所以我近呢幾年搵到錢之後一到節日我都會畀利是佢，咁佢就最開心！不過嚟緊佢等緊我買層樓畀佢啊，我就話：媽咪，我努力吓啦！努力吓會有呢一日！」

Ali坦言今年比往年有很多同事支持她在頒獎典禮上得獎，令她信心大增：「佢哋會走過嚟同我講『今年係你㗎啦！我哋買重你！』，當同行同幕後同事都畀肯定嘅時候，我就會覺得呢個肯定好難得，但都會令我覺得如果攞唔到會令佢哋好失望，然後我自己都會好失望。」