【早霸王】男聽眾回味如何被女神迷倒　森美忍笑忍得好辛苦

識朋友，第一印象真係好重要，就好似今期《你知道唔知道有人掛住你 》男主角Bosco，佢準備同一名叫芳芳嘅女子表白：「第一次見佢係朋友介紹，佢着住半披外套，好有全智賢女神feel，跟住個樣似吳若希。」聽到吳若希呢個形容之後，森美即時靜咗一秒，然後投訴感覺如同由太空跌落地面：「吳若希出名唔係因為樣喎！而係性格。」Bosco話女神性格爽朗、直接、強悍，同吳若希都好相似，之後更舉例說明。「第一次見時食飯，佢一坐低就已經話想飲湯、想食中菜，冇點問我意見，心諗呢個女仔都幾客氣下喎……不過就係呢個性格吸引我。」森美聽完都指Bosco：「想搵個恰自己嘅。」

之不過，原來呢個飯局仲有下文，據Bosco形容，芳芳當晚飲水時，撥頭髮嘅動作令佢完全淪陷。「佢嘅優雅令我真係以為佢飲緊紅酒，嗰刻好吸引我。」聽Bosco回味嘅語氣，真係陶醉到不得了，而森美就笑到收唔到聲，指Bosco似「中毒」，之後Bosco再分享同女神第二次約會，並笑言「呼吸都覺得靚」，讚到天上有地下無，森美準備打畀芳芳時，Bosco仲話要夾下流程。電話接通後，芳芳把聲確係爽朗，佢同森美講暫時沒有拍拖，更笑言「因為啲男仔衰咸濕」，但之後都有解釋「衰冇feel」。

但係咪真係一個啱feel都冇？芳芳又話唔係喎，並指近來都係同某人出街，但就嫌對方「唔係好話得事」，又指之前對方約佢睇燈飾好冇新意，森美聽到都十分認同，並教路︰「當然唔係話去睇燈飾啦，話去影相咪得囉。」雙方電話接通後，Bosco深呼吸一口氣，讀出愛的宣言：「我記得你問過我有咩條件，我嘅要求就係必須要係你，另一次我唔舒服，你問我做咩身體咁差，我答你，對住你冇咩抵抗力，你望住呢一分鐘，係屬於我同你，可唔可以做我女朋友？」Bosco深情到一個點，但森美就應該忍笑忍得好辛苦，咁女主角又點呢？佢就好爽快咁話：「可以諗下。」