【殺手】龔嘉欣做打女再受傷　腳傷不停滲血縫三針

TVB重頭劇《殺手》最近拍攝得如火如荼，由於劇集屬於動作類，劇中演員都有不少打鬥場面。為了拍攝效果更真實，飾演職業殺手的龔嘉欣都親身上陣，但就搞到周身傷，嘉欣今日（30日）在IG post了一張黑白相，留言表示：「又傷了！但仍要撐住！今晚繼續！難不倒我！」網民紛紛留言為她打氣，還叫她要保重，好好照顧自己。

對於今次受傷，嘉欣接受《香港01》訪問時就表示：「尋日拍攝打鬥場面，唔小心，踢飛腳踢左落把槍度，因為係着短褲，所以鎅開左啲肉，嗰陣有消毒，不過止唔到血，不停換膠布傷口都係滲血，收工之後去咗醫院，縫咗三針。」其實嘉欣已經不是第一次受傷，堅持不用替身的她，親身上陣拍攝高難度動作鏡頭：「其實每次都有試咗好多次位，不過拍打鬥一定會有意外，呢套劇我所有動作都係自己做，一次替身都冇用過，加上我嘅戲服全部都係 bra top 短褲，所以係完全墊唔到任何pad保護，周身損傷係一定。」

其實嘉欣之前都受過傷，上個月她就在IG自爆拍打戲搞到手指斷筋，直至宜家都未康復：「上次就係真嘅木棍扑落隻手度，嗰刻係好痛嘅，但係我都完成晒全日嘅拍攝到通宵，第二日先睇醫生。其實手指仲未好返，依家係變咗形，同埋瘀黑，雖然已經係一個幾月之前整親，不過掂到隻手指都仲係痛。」

雖然接拍呢套劇搞到周身傷，但嘉欣毫無怨言，更感謝拍檔的幫忙：「當初接得呢個角色，都預咗，已經好好冇咩大嘅傷。雖然係辛苦，但係睇返啲片真係覺得好值得，因為我從來冇諗過自己會做一個打女，每次睇佢哋示範，然後叫我做嗰個動作，我係唔覺得自己做到嘅，但係最後都做到，成隊crew都會拍掌鼓勵我，監製都成日比信心我，仲要祥哥，阿Mo每次拍打都好照顧我，又會教我，所以我賺晒㗎啦，少少傷頂得住。」相當敬業！

嘉欣透露《殺手》將於12月尾煞科，對於會否再接拍打戲，她就表示：「冇諗咁多啊，淨係想順利完成埋剩返嘅打戲，但拍完呢套都會好好睇返好身體。我身邊啲人擔心過我，我知佢哋好心痛，所以自己都會小心啲唔好再受傷，如果監製覺得我適合嘅，我都唔介意再拍。」

希望嘉欣早日康復，繼續post多D靚相啦！