【是咁的，法官閣下】同《心冤》碰巧撞蹺 葉念琛：着眼點唔同！
無綫（TVB）台慶劇《是咁的，法官閣下》踏入結局階段，最近幾集正便上演「兒子弒雙親後肢解」這單終極一案，講述細細粒（陳嘉佳）飾演的阿Bell被陳志健飾演的阿鬼利用，因為有份參與肢解、分屍過程，陳志健又指她有份落手殺人，所以被控謀殺、非法處理屍體等罪名，而黃智賢便率領一班大律師到庭上為她洗脫罪名。好多觀眾都大讚細細粒演得非常好，十足一個值得十歲智商的弱智人士，又喊得非常淒涼長期眼腫腫，極度令人心酸。
不過，以上情節竟然與葉念琛執導，惠英紅、黃秋生、謝君豪主演的Fox劇集《心冤》其中一個故事撞到應一應。兩劇同樣以2013年在大角咀發生的「周凱亮弒雙親碎屍案」為原型。
在《心冤》的第三集裏面，飾演冷血兒子的吳肇軒，因妒忌兄長備受雙親關愛而冷靜地殺害父母，事成後他便叫經常受其情緒勒索、智商低於常人的朋友（阮德鏘飾）協助他肢解屍體，再到警署報案室報案。假裝痛傷的吳肇軒便講出一些對阮德鏘不利的口供，更預先製造了一些對阮德鏘不利的證據，希望自己最後逍遙法外，但一切都難逃主角惠英紅的法眼。
而《心冤》這集最值得一提的是整個弒親、分屍過程都「足本」呈現，觀眾能夠仔細地「欣賞」到吳肇軒和阮德鏘如何將死者慢慢肢解，雖然劇組以藍光淡化畫面上的血紅色，但因為鮮血四濺得非常誇張，兩名「屠夫」滿身沾染了接近黑色的血液，加上滿地人體殘肢，令觀眾彷彿隔着熒幕都聞到了一股血腥味。
葉念琛接受《香港01》訪問時便指其執導的《心冤》比起《是咁的，法官閣下》更早開拍：「其實《是咁的》播之前一段時間，我哋就知道佢哋原來都有呢單案件。（有人抄蹺？）咁我又唔覺得，因為兩套劇講嘅本身都係真實事件，當時又真係好轟動，大家都係用同一單案改編真係唔出奇。我都有追《是咁的》。」
至於會否覺得被人搶走頭啖湯？葉念琛說：「咁兩套劇都唔同嘅，我哋比較着重查案、推理，《是咁的》就係法庭戲，拍攝手法、角度都唔同，更何況邊個播先、邊個播後都唔係好緊要，都係各有各拍，觀眾都有各自嘅睇法、定案。」
《是咁的，法官閣下》編審李茜接受訪問時便指「撞蹺」純屬巧合，亦謂不知道《心冤》亦參考了該單兇殺案：「其實我冇依足嗰單案件去寫《是咁的》，亦唔需要去依足，如果要依足就應該有晒資料先對所有人公平，唔想當事人難受，而我都只係以相關報道、去法庭聽審咁取材，我由開庭第一日去到最後一日都有聽，劇集最主要都係用返個法律觀點，而我對個案情興趣不大，所以好多嘢都改動咗。」
提到《是咁的，法官閣下》贏口碑輸收視，李茜坦言當初寫劇本時沒有從市場出發：「我都仲消化緊啲反應，我好用心、認真去設計人物同故事，觀眾鍾意唔鍾意都好，我都問心無愧。（你獨力用10個月時間寫完劇本，會否好辛苦？）比想像中OK，因為套劇好需要法庭裏面嘅邏輯，佢哋有自己嘅一度，如果幾個人夾住寫未必接到，其實只要成件事都好專心就得，都好順利，冇咩難關。」