【女人四十】正式約滿ViuTV　阿旦唔抗拒簽TVB：錢未必係最重要！

田蕊妮主持的節目《女人四十》播出以來，受到不少女性觀眾熱棒。最新一集，田蕊妮就邀請34歲阿旦（鄧洢玲）和化妝導師Gaby一同到內衣店尋找最適合自己的Bra。但不少觀眾看見阿旦上節目，一度以為自己眼花，分不清自己在看TVB還是ViuTV。

阿旦曾是施念慈旗下的模特兒，2011年參加參加now TV舉行的「CEO選拔賽」得到亞軍，之後正式加入now TV做藝員，主要幫Now觀星台做主持。2016年開始，阿旦兼埋ViuTV嘅工作，並主持《的士Go》和《晚吹- 啪啪聲，太好聽》等節目，ViuTV主持的形象在觀眾心中根深柢固。阿旦接受《香港01》時透露自己已回復自由身，她稱：「其實我自由身咗成年，上年3月已經無約喺身，但因為仲有啲節目未完，就轉用部頭約方式合作，但都係去到7、8月左右。（同ViuTV合作咗幾耐？）由now開始計都五年左右。」

至於為何要離開ViuTV，阿旦就坦言不想再框死自己：「其實近年我都嘗試做唔同嘅工作，好似開按摩店做生意，又出錢請crew拍旅遊片擺上YouTube，嚟緊都會拍一啲同足球有關的節目，亦都會同內地網絡平台傾合作。（會唔會唔捨得娘家？）點講好呢，喺娘家有自己節目，仲有機會做唔同合作係好事，但我覺得自己要進步，依家都度緊搞Talk Show同出旅遊書。（咁忙咪冇時間拍拖？）以前就係花太多時間拍拖，人生目標淨係想結婚生仔，所以依家會花多啲時間喺工作上。」

問到與田蕊妮是否相熟，阿旦就稱：「又唔算超級熟，互相認識。不過拍呢個節目之前我哋都有出嚟開過會，傾咗好多關於女性角度嘅問題。（試Bra怕唔怕尷尬？）唔會，都拍得好自在，而且有得同唔同嘅平台合作好開心。（會唔會想轉簽TVB？）有機會合作當然開心啦。（怕唔怕人工低？）睇發揮機會，錢未必係最重要。」