董敏莉宣佈「最強小三」正式面世　與愛女同月同日同磅數勁有緣

董敏莉（Monie）今年7月宣布懷孕時，更笑言囡囡係佢同老公之間嘅第三者，日前呢位「最強小三」終於出世啦﹗

女兒係爸爸嘅前世情人，董敏莉（Monie）今年7月宣布懷孕時，更笑言囡囡係佢同老公之間嘅第三者，日前呢位「最強小三」終於出世啦﹗媽媽無呷醋之餘，仲話同囡囡相當有緣份：「我專登揀同自己生日開刀，以後方便一齊慶祝，點知囡囡同我同月同日同磅數出世，真係緣分！」

Monie同好友吳日言、林芊妤差不多時間懷孕，孕期中亦面對唔同難關，阿YAN患上妊娠糖尿，Coffee胎盤前置，而Monie亦因為有子宮肌瘤，令生產過程面對好大風險：「因肌瘤頗大阻礙產道，增加手術風險，醫生都講明有危險性，驚失血過多，有二千分之一機會要切除子宮，最終醫生盡力幫我止血，大小平安。」

雖然面對好多風險，但見到囡囡出世一刻，Monie同老公都相當感動，覺得一切都值得：「老公有入產房陪產，我專登揀同自己生日開刀，以後方便一齊慶祝，點知囡囡同我同月同日同磅數出世，真係緣分！我哋一早已經幫囡囡改好名，中文名叫子子，英文叫Martha。成個過程都好順利，初時都會餵人奶，希望畀到最好嘅營養BB。」

產後Monie會停工兩個月，但手上已經好多廣告搵上門：「電台主持嗰度我就請咗兩個月假，到我身體回復之後就會返去開咪。其實大肚期間都有好多媽咪級嘅廣告搵我，睇來我都已經開拓咗一個新嘅市場。（會唔會考慮母女檔上陣？ ）咁長遠梗係未諗啦，如果阿女好似我咁靚，爸爸又准許的話，都唔介意佢入行嘅。」