【鋒味】Chef LeMon孖吳彥祖用腳踩葡萄酒：看起來不太開胃

Chef Le Mon新一季《鋒味》開播，首集搵嚟台灣女神林依晨做嘉賓，不過，成集最好睇嘅一定係彩蛋部分。

早前Chef Le Mon自己都有預告過搵咗吳彥祖做嘉賓，二人遠赴希臘飲飲食食，彩蛋中，吳彥祖同Chef Le Mon見到當地嘅小朋友用腳踩葡萄汁釀酒時，甚感興趣，於是提議一齊踩。其實喺未機械化壓榨之前，大部分葡萄酒都係用腳踩的方式釀製而製，之不過，就畫面所見，吳彥祖同Chef Le Mon只係用水簡單咁洗腳，而吳彥祖仲話盤水唔知有幾多人洗過……而啲葡萄亦唔係放喺大形器皿之上，而係地下，再流到外圍嘅鐵桶，雖然好似唔多衛生，但就保証夠天然。

話晒都係自家製，Chef Le Mon當然要試試，不過當佢打開塊隔渣過濾布時，都忍唔住講咗句「看起來好黑」，而吳彥祖就直情「Oh my God」。見到杯腳工葡萄酒啡色得嚟又有少少混濁，Chef Le Mon同吳彥祖都面有難色，但一句「You drink I drink」之後，吳彥祖一口氣飲晒，而Chef Le Mon就品酒一樣，味道如何呢？佢哋都異口同聲話好甜，仲話呢啲先夠organic。

之後二人各自「邀請」經理人試味，但Mani就十分抗拒，仲話：「整個過程我都看到了，吳彥祖只輕輕地洗一下腳，霆鋒洗了兩次，如果這酒我喝了就死定了。」最好笑係Chef Le Mon不停咁話「新鮮嘅汁係啡色，蘋果汁鮮楂都係啡色唔係金黃色。」並指呢杯係直直正正嘅LA FEET。