【爸媽學前班】與賴弘國慶祝相戀一周年　阿嬌勁冧：多謝佢包容

阿嬌（鍾欣潼）與未婚夫賴弘國參加的內地真人騷《爸媽學前班》日前播出第七集。原來拍攝期間，係阿嬌同賴弘國拍拖一周年紀念日，節目組就特別安排於紀念日當日，要佢哋兩個喺倫敦街頭尋找愛情聖地，為二人的紀念日增添浪漫氣氛。

紀念日當天，佢哋兩個嘅任務係「探尋愛情聖地」，於是佢哋就去搵電影《摘星奇緣》（Notting Hill）嘅拍攝場景，電影講述了一位女明星與書店老闆的戀愛故事，令兩小口非常有共鳴。阿嬌同賴弘國仲着住白色情侶裝，在倫敦街頭搵景，可以咁輕鬆喺街頭漫步，二人都話：「十分珍惜這樣難得的自由時光。」

除咗搵電影場景，賴弘國亦都準備咗驚喜給未婚妻，二人去到餐廳，賴弘國親自下廚煮愛心晚餐，搞到阿嬌勁冧豬，食緊嘢時，佢哋仲好深情咁對望，然後話：「一周年快樂。」餐後阿嬌亦都分享咗自己心聲，「感謝他一路以來的包容與接納。」節目尾聲，二人喺「星空小屋」齊齊許願，「不要把時間定格在這一刻，每天都要有新的進步。」