劉德華認對太太唔夠直白：拍戲慣咗生離死別先感動
劉德華早前接受商台節目《雲妮鍾情》訪問，由於華仔同主持人Vani相識28年，再加上二人早前都各自經歷一場大手術，故於節目中無所不談，期間Vani更一時感觸落淚。
節目中，華仔除談及年底舉行嘅演唱會以及墮馬事件外，亦罕有談及自己嘅愛情觀。「最唔直白係對愛人，屋企我會表達，可能係因為拍戲慣咗可歌可泣嘅愛情故事、生離死別先會感動。」華仔話喺電影經歷了太多人生，雖然劇本早已設定角色，但演員亦會賦予角色生命，而當中少不免會有自己的愛情觀，他更以自己的經典作《天若有情》解說。「即係話JoJo（吳倩蓮）、華Dee我都記得，我哋談戀愛時經歷過，到底係朋友定係愛情呢？愛情我好精忠，但到一個critical moment（關鍵時刻）朋友需要我，我可能擺低女朋友，現實生活都係咁 ，不過當然唔係去犯法啦。」
華仔指如果有朋友失戀需要佢陪伴時，就算當下佢係同女朋友食飯，佢都會選擇朋友。「好似JoJo咁，你自己跪喺度，有乜嘢同佢講啦，自己偷偷地走咗去。依家男性就係冇做到「偷偷哋」，其實只要畀到台階女方落台就得架啦。」華仔指自己的愛情雖然未會好似電影咁戲劇化，但態度都係一樣的，他認為尊重是最重要的。聽到Vani笑言劉德華的女人應該是世上最無安全感的女人時，華仔似乎唔多同意，並說：「點解呀？我問下佢先。」Vani指華仔由古墓密不透風到近年公開自己擁有家庭，過程中是否給予了另一半很大的安全感，華仔認為只係生活上的協調。「從來冇介意過（公開），只係未係時候，另一半可以習慣見到你啫，唔習慣見到佢哋，咪等佢喺一個comfort zone生活囉，我哋太耐啦，所以都清楚。」Vani隨後表示「咁你帶佢出嚟見我之前，有無問過佢？我淨係想話你知我好鍾意佢(朱麗倩)」，華仔聽完就即時好冧咁講咗一句「我都係呀」表白得勁高招！
華仔提到以前網絡未咁發達時，他與另一半可以很安心行街或出外旅遊。「但依家唔得，你想對抗？冇！所以依家做到得幾多咪做幾多囉，亦冇得介意，但我唔會放，唔會因為被影到就去公開。」華仔又話歌迷基本上都見過晒佢嘅屋企人，有歌迷勸佢豁達一點面對傳媒，但佢就話每個人對豁達都有不同的定義，Vani問到華仔可曾同囡囡解釋過自己嘅職業，華仔反問Vani︰「點解要同佢講？」並認為可用生活方式令囡囡適應。