【專訪】王祖藍幫唔到公司藝人賺人仔？ 「有時真係要睇際遇」
每當內地發出「限乜令」時，媒體要搵香港藝人做回應，王祖藍基本上都係頭號目標，原因怕且都唔需要再多講啦……對於近年國內小鮮肉同流量小生大行其道，三十有八嘅王祖藍憑乜同佢哋爭一席位?要打入內地市場係未真係夠搞笑就可以？「普通話係最大問題，其次係成長背景，有時同人傾，佢哋提到嘅卡通或者小品都唔係好知，變相好難融入，跟唔到就係跟唔到。」祖藍於內地第一個綜藝節目《百變大咖秀》，以模仿經典人物為主，所以就算唔熟識，也可以用扮嘢去補救，對他而言，是一課很好的速成班，也算是一支好籌。運氣再加勤奮，令他跑出今天的成績，但公司數十藝人，跑極都好像只有他較為出色，外人難免會有「只顧捧自己」的諗法。「有時真係睇際遇，接戲、接騷同宣傳我哋都無問題，但每個藝人都有自己際遇……」
香港巨星vs內地鮮肉
其實去年訪問祖藍時，他曾說過成立公司後，才發現國內每個地方捧人都有不同的「程式」，為此他招聘了不同的工作人員去解決問題。而當問題化解了之後，還得看藝人的運氣……提到近年時裝品牌不惜重金聘用流量小生做代言人，香港雖然也有不少天皇巨星，但就似甚少享受「重金」代遇，原因何在呢？「外國品牌都係好現實，睇數據，呢個係必要。其實，香港在政策或演藝培訓方面可以做返好啲，依家嘅土壤唔係好夠營養去培育一啲出色演藝人。」內地有專科培育演藝人，單係北京電影學院、中央戲劇學院每年就已經有大量「出產」，反觀香港演藝學院近年頻頻收生不足，更甚的是，連大台藝員訓練班也由一年縮減至三個月，點比？身為廣西壯族自治區政協委員嘅祖藍唯有盡力幫，無論係幕前抑或幕後，他都希望有錢齊齊搵。
重返舞台劇
其實用百足咁多爪去形容王祖藍真係好啱，綜藝、唱歌、編導樣樣掂，而近排佢連舞台劇都玩埋。演藝學院出生嘅佢，早年曾獲提名香港舞台劇獎最佳男主角同男配角，功力有返咁上下。下月公演嘅《唯獨祢是王2》，他並非首次演出，不同的是，今次的大衛由小男生昇格為王，與飾演將軍妻子嘅鍾舒漫發展姦情……「最擔心係唱歌同時間，因為好耐無踏台板，同埋做綜藝節目好傷聲，之前做福祿壽有人同我share，依家差不多係我自己去捱晒，同埋我好耐無體能訓練……」
每年都會抽空到外國睇歌舞劇嘅祖藍，預告《唯獨祢是王2》只是前奏，雖然明知要在香港搞舞台劇十分困難……「應該要諗下點更貼近觀眾、同點提升質素，只要做好呢兩樣，再有軟件去配合就ok，boardway到今時今日仲加緊劇場，每年culture tourism都有增長，我每年去都會同嗰邊製作人、公司傾，希望可以帶到一啲經驗返嚟……」看來王祖藍賺人仔之餘都非常照顧香港市場……
場地：香港九龍貝爾特酒店
髮型：Ted Yeung@i i Alchemy hair & nail
化妝 :K.T Tsui
Styling:Dicky Lee
服裝：Bettie Bespoke