胡杏兒生日獲老公送驚喜　入住水底別墅索價39萬一晚有咩玩？

馬爾代夫係唔少人夢寐以求旅行嘅地方，藍天白雲一望無際清澈大海，一直係度蜜月至愛目的地第一位﹗胡杏兒懷孕喺馬爾代夫影相宣佈造人成功，今年生日佢地再次返到馬爾代夫，仲係Baby Lee第一次旅行，李承德就為老婆囝囝炮製一個豪華驚喜﹗

11月6號係胡杏兒39歲生日，佢地喺香港開完生日會，就舉家飛到馬爾代夫度假，連日嚟都分享唔少靚相，但呢日李生李太洗版式分享其中一晚入住嘅地方 --- 世界上的第一間水底別墅The Muraka。整間別墅建於水平面下5米深，雙層建築包含海上空間，以及供客人休憩安眠嘅海底套房，以螺旋樓梯連接，提供180度的印度洋全景視角海底世界，每晚索價達五萬美金，折合港幣近40萬﹗

從杏兒IG片段睇到，睡房以玻璃建造，望住無盡海洋生物游來游去，就連座廁旁都被魚包圍住。李承德留言中更透露，原來佢地係首個入住水底別墅嘅家庭﹗﹗「Muraka - 世界上第一間水底別墅，剛剛在11月18日開業，我們很幸運成為第一個入住的家庭。Brenda唔知自己係幾咁幸運，可以成為第一個入住嘅Baby，但佢亦花咗好多時間，不停盯著不同類型五顏六色嘅魚游來游去。」杏兒亦覺得可以喺魚包圍下瞓覺沖涼，係件相當神奇又可愛嘅事，相信佢對呢次生日之旅安排一定俾足101分。