林師傑歐陽巧瑩婚前勁忙　仍抽空親手整曲奇贈同事親朋

林師傑與歐陽巧瑩 (Tammy) 將於今個月22日舉行婚禮，婚前二人非常忙碌，不只要忙派帖、影婚紗相等婚禮事宜，更要忙工作，師傑更說忙到結婚前一兩天才放假，二人在結婚前十天還要赴日本參加Tammy家姐婚禮，雖然忙成咁，但兩口子仍堅持親手整曲奇餅，送畀TVB同事和朋友食，非常有心思。

曲奇餅上印有Tammy和師傑英文名字的開首字母，因為擺酒場地所限，請唔晒全部同事去飲，所以一對準新人就親手整曲奇送給其他同事，「我哋圍數本來係定30圍，宜家都爆晒喇，好多同事朋友都真係請唔到，所以就諗住請佢哋食餅囉，有諗過買中式餅，不過最近好多Artist朋友都結婚，我諗公司啲幕後都食到膩咗，所以就整曲奇。」相信大家都會好鐘意！