電視浪人劉家聰耗70萬割腦巨瘤　手術後一度半邊身癱瘓

身高6呎2、今年40歲的劉家聰（前藝名劉子蔥）在年初發現腦部生瘤，10日後即在浸會醫院接受開腦手術，切除接近拳頭大小、直徑達6cm的腫瘤，其後他轉到伊利沙伯醫院接受30次電療，現在病情已經好得七七八八，可以出席各大活動分享康復經歷，亦有份在舞台劇中演出。談到1月時發現腫瘤的經過，他接受《香港01》訪問時便指自己一直不煙不酒，作息定時，生活非常健康：「其實我每日都會跑大帽山，但有一日，我發現我跨過啲石頭時，我覺得心驚膽怯，我就知道我身體出現咗毛病，我以為係我做嘢太緊張、太攰。」得到太太諒解的他毅然離開有線娛樂新聞的工作崗位，經朋友勸籲後檢查身體，才發現一切問題源於腦部生瘤，因為沒有醫療、危疾保險，所以花了70多萬積蓄去做手術。

「Quit咗有線之後、發現腦瘤之前，我去咗間中學幫班學生做生涯規劃，分享做娛樂新聞嘅嘢，好多同學仔都有興趣，好想做娛樂記者，有啲仲好勁，講得出所有韓星嘅嘢。到我發現有事時，我就同醫生講，我唔可以有事，我一定要完成晒成個Course，而家先上咗兩堂，我唔可以咁就走咗去。」當時醫生給予他好大信心，但事實上腦部是人體最複雜的器官，手術絕對有一定危險，3個醫生在一個手術室內，要10小時內完成所有程序，否則劉家聰便會「係咁先」，好在整個手術只用了7小時：「做手術前，我不斷諗『我唔可以死，我唔可以掉低我個女』。」

對於醫生，最艱難的可能是手術本身，但對於劉家聰，復健階段是最煎熬：「我知道做完手術之後，會講唔到嘢、食唔到嘢，甚至斷片，但情況比我想像更辛苦，因為我個瘤喺右邊，所以手術後我左邊全身都郁唔到，坐咗輪椅一段時間。」雖然如此，但他沒有放棄自己，更積極令自己回復手術前的狀態，不但逐步逐步重新學行，又叫舊同事供稿讓他朗讀練發音：「仲要做健身，因為如果唔郁，肌肉就會萎縮，慢慢我就由行到路變到行到山。」

康復過程中，劉家聰慢慢意識到正視腦腫瘤的重要性，講到自己的發病原因，他坦言：「雖然我阿叔、姑姐都有Cancer，但我呢個病應該唔係因為咁，其實我呢個病一直都唔多資料，好容易俾人忽略，好可能一啲交通意外，都係因為司機個腦瘤發作，突然失去咗距離感造成。有好多病人都好似我咁，做人好積極，成日做運動保持自己健康，但每次有事發生都好緊張，可以少少唔如意就會好忟，太過熱愛自己嘅工作，所以真係要分配好自己嘅時間，唔可以太Chur。」

劉家聰希望可以以生命影響生命，所以除了分享經歷，亦參加了醫療輔助隊：「經歷呢個病之前，我會覺得就算唔得都要勉強自己得，一定要堅持住；但病完之後，我開始識得放慢腳步，欣賞、享受每一個過程，所有嘢都要按部就班同好準備，由內心出發，唔係好似以前咁，咩都夾硬加上去。」參加無綫藝訓班入行的他先後為無綫、亞視和有線效力，參演過好多劇集，亦在兒童節目《至Net小人類》、《放學ICU》中亮相，絕對是陪着好多小朋友成長，講到未來的演藝工作，他便希望以剛剛完成、以器官捐贈為題材的舞台劇為起點，重新出發。