【周遊東京2】獨家花絮！　「日本旦哥」私傳周奕瑋烚蛋秘技

「品酒師」同「品油師」大家都就聽得多，但「品蛋師」又聽過未呢？周奕瑋（Jarvis）主持的旅遊節目《周遊東京2》最新一集就帶大家一間雞蛋專門店，餐廳除了有多款不同的雞蛋任均選擇之外，主廚更加是一名擁有資格證書的「品蛋師」，名副其實是「日本旦哥」，他更私下教授Jarvis一招烚蛋的秘技，他亦將其所學，獨家向《香港01》讀者分享。

節目最新一集以「究極的美食家」為主題，Jarvis解釋指：「因為日本有好多對食材好嚴謹的狂人，好似今集講炸蝦嘅大廚，餐廳除咗淨係有炸蝦賣，蝦都有唔同嘅品種同級數，而且個大廚每次都將個蝦頭整得乾乾淨淨，唔容許有任何蝦身上面的炸粉同麵包糠沾到蝦頭，先肯落鑊炸！炸都要炸咗啲腳先，好似啲蝦喺隻鑊度游水咁，佢哋覺得咁樣會炸得更加分明，對食材的態度好瘋狂，令我好佩服。」

海老フライ専門店 海老昌

地址：東京都 渋谷区 道玄坂 2-22-6 CREA道玄坂ビル B1F

烚蛋要好味？　要留意有效日期

而「日本旦哥」亦有私下教Jarvis烚蛋的秘技，他透露：「原來蛋的有效日期同你煮隻蛋有好大關係，好似平時我哋煮嘅烚蛋，佢話好多人都以為煮『蛋料理』越新鮮就越好，最好就係隻雞啱啱生出嚟就即刻攞嚟用，但其實品蛋師就話隻蛋越近有效期，唔係過期喎，嗰啲蛋攞去烚先係最好味，個蛋白嘅彈力先會越彈口！」

Jarvis亦有聽「日本旦哥」講解日本人的靈魂食物──T.K.G.（生雞蛋蓋飯），他稱：「旦哥話要品嘗雞蛋最美味的方法一定係T.K.G.，因為雞蛋冇經過熱去改變強的味道，所以最能夠食到蛋黃嘅香，所以就整咗T.K.G.放題。呢間食店，一到放飯時間就會有好多人去食，好犀利！」真係估唔到，食隻蛋都咁有學問。

喜三郎農場

地址：東京都文京区千石1-23-11