【周遊東京2】周奕瑋推池袋隱世海鮮丼　鏡頭背後原來有洋蔥

周奕瑋（Jarvis）主持的旅遊節目《周遊東京》贏盡口碑，節目再添食《周遊東京2》在今晚（5日）播出。Jarvis除了繼續鑽竉鑽罅 為觀眾介紹貼地又鮮為人知的美食，更加會為大家訂立多達20個的周遊主題，與觀眾結伴玩盡東京的隱世旅遊熱點﹗首集的主題是「一集限定」，Jarvis解釋因為上一輯的放題、海鮮和搶衫均受到觀眾喜愛，所以會以「舊主題新景點」的方法為大家發掘更多新資訊。

當中，一間隱世海鮮丼是Jarvis學生時期的回憶兼重點私心推薦，他透露：「みなと 西池袋其實係一間位於池袋的魚生飯店，當年我每日由屋企行去池袋火車站返學嗰陣，都一定會途經呢間舖頭。嗰陣時，一個人喺嗰邊讀書唔係好多錢，可能一個禮拜預自己食飯錢都係千幾円，講緊嘅係晚飯，因為晏就會喺學校食三百幾円嘅便當。所以，嗰陣晚飯都係預一餐四、五百円左右或者會買吓餸返屋企自己煮飯，唔會預自己使好多錢。但你去日本就梗係好想食魚生，路過就覺得好吸引，但就冇咩機會可以入去食，有時想獎勵自己一餐，周末間中都會去食個lunch。」

為了與觀眾分享自己學生時期回憶中的味道，Jarvis一心想到這間小店拍攝，但當工作人員越洋打電話去約拍攝，卻遭到拒絕：「其實呢間店係由一對老夫老妻經營，當時聽到我哋想拍，其實老公係OK，但老婆就唔畀，所以拒絕咗我哋，嗰陣我都覺得好可惜。喺拍攝節目嘅時候，我同攝製隊就特登抽咗一日嘅時間去食一次，諗住過去親自打聲招呼，想睇下有冇機會可以介紹到，當然都唔想強人所難。一開始都係想食個飯，坐一陣。但食到咁上下嘅時候，我就同個老闆娘傾偈。之後，佢就問我點解會想拍攝，咁我就同佢講咗我呢個當年留學嘅故事同自己做節目嘅理念，好多時其實食一間舖頭唔係淨係食佢個味道，有時係想食佢嗰份人情味。傾到最尾，我九十度鞠躬講咗句多多指教，估唔到佢聽到眼濕濕， 之後老闆娘就話俾我呢份精神打動到，就應承俾我哋拍。」Jarvis更稱老闆娘透露小店一直拒絕任何的傳媒採訪，但最後覺得大家的理念相同，所以就破例接受《周遊東京2》的採訪。

みなと　西池袋

地址：東京都 豊島区 西池袋 1-37-12 ロサ会館

另外，為了彌補上一輯的小小遺憾，Jarvis決定重返亞洲及日本第一個大型攀登景點Muscle monster進行拍攝，他笑稱：「其實上次已經想拍，但遇着東京大風雪，去呢度嘅路結晒冰，所以去唔到，一直都覺得好遺憾。今次等咗十個月，加上知道再返東京拍嘅時候就覺得死都要去，挑戰一次。最終，就將佢放係第一集，雖然呢個唔係回應觀眾訴求，但係我自己想完咗上一集嘅心願，係我私心擺落去。」

相模湖 RESORT -Muscle Monster

地址：神奈川県相模原市緑区若柳1634番地

而Jarvis亦徇眾要求，承接在上輯的100円服飾放題，再次挑戰另一間500円的服飾放題，每位參與者獲分一個紙箱，限時5分鐘內把搶到的衣服塞進紙箱內，塞到幾多得幾多，相當過癮。

土橋商店

地址：東京都中野区沼袋1-13-6

石川縣產的Ruby Roman被形容為日本葡萄界的愛馬仕，最貴賣到110萬円（約港幣76,796）抽，接近港幣3千元一粒，但有Jarvis喺大廳，大家唔洗驚，這間店迷你杯裝Ruby Roman，只要百幾蚊就可以一嘗這款天價葡萄的滋味。Jarvis笑稱Ruby Roman是吃過味道最複雜的提子，皮爽肉甜，吃後還帶點紅酒味回甘。

Sun Fruits 東京（Midtown店）

地址：東京都 港区 赤坂 9-7-4 東京ミッドタウン ガレリア B1F

本格炭火焼肉　武蔵

地址：東京都中央区銀座7-2-20 パシフィック銀座ビル 4階