【美女廚房】G.E.M.鄧紫棋再下廚　以「功夫菜」洗地獄廚神污名

9年前年僅18歲嘅G.E.M. 鄧紫棋，上TVB節目《美女廚房》，一道「屎味魚蛋」震驚宇宙，榮登地獄廚神第二位，方力申更將「G.E.M.」戲稱為「Get Everyone Moving to the trash」（讓每個人都走去垃圾桶）。雖然好有陰影，但G.E.M.從未放棄過煮嘢食，拍MV又煮，見好姐妹又煮，走上謝霆鋒節目又一齊煮，睇落的確有板有眼咗好多，不過之前就試過炒炒下蛋攪到火警鐘狂響。

所謂邊度跌低就要邊度爬起身，九年後佢終於再戰新一輯《美女廚房》一眾評判吃到食指大動，贏得今集「美女廚神」！她終於一雪前恥，踢走九年前「地獄廚神」的稱號：「贏到比賽咁就梗係太開心啦﹗我九年前係地獄廚神第二位，即係包尾二名，所以今日我竟然贏咗，呢件事實在太不可思議。」

今次勝利全靠一味蕃茄炒蛋，G.E.M.原來真係花咗好多心機：「我喺屋企練咗好耐啦，因為其實我好鍾意食，入廚第一道學嘅菜就係蕃茄炒蛋，日日喺屋企不停練習，試咗好多唔同版本，落糖落鹽鑽研個比例，淨係落蕃茄定係落埋蕃茄醬，好多唔同版本。今次用呢味我第一道學嘅拿手功夫菜勝出，真係非常感動，返屋企一定要多謝爹地，因為係佢教我煮呢味餸。」