【妻子的浪漫旅行】 陳小春求婚爆喊片流出　應采兒爸爸：我願意

求婚一世人一次，好多人唔明點解女士會有無限幻想，特別男士覺得拍拖時間耐咗，大家想結就結，何必做一場大龍鳳呢？陳小春2009年向應采兒求婚成功，眨下眼已經結婚八年，佢地喺內地綜藝節目《妻子的浪漫旅行》中，播出當年求婚片段，估唔到喊到收唔到聲嘅居然係小春﹗

之前應采兒喺節目中已經爆料，話當年小春求婚時喊到收唔到聲，不過口講無憑，新一集就將當年求婚片段完整播出。片段一開始小春已經跪喺地下，身穿綠色背心嘅應采兒就企近門口掩咀而笑，既驚又喜，劇情發展落去梗係問句願唔願意然後禮成，點知小春淨係一直跪：「er……我不知道該說什麼。」

現場有份見証嘅應采兒爸爸爸媽媽，見到小春講不出聲真係笑個唔停，應爸見佢唔出聲仲搶先話：「小春，我願意嫁給你﹗」應媽都幫口：「再不講我幫你講囉﹗你到底答不答應。」正常人求婚係單膝下跪，而小春係一直雙膝跪喺度，仲親自搵嚟應采兒父母見証，呢份心意點可能唔感動。到最後終於講出一句「嫁給我。」二人擁吻結成良緣，9年後重溫陳生陳太依舊感動，應采兒仲話：「時隔多年，我比求婚當天哭的還要慘。」