網民推《開心速遞》池美麗扮飯托Karen：幫速熊做速托一定好正﹗
撰文：洪曉璇
出版：更新：
TVB劇集《愛．回家之開心速遞》一向深受觀眾歡迎，經常大讚編劇將時事融入劇情，啜核又好笑，而劇中大小角色演得夠放，處境劇晚晚播入屋絕對無難度啦。有網友發現飯托事件中女主角Karen，同《愛．回家之開心速遞》中飾演池美麗嘅鍾凱琪相當神似，成為熱話。
鍾凱琪飾演嘅池美麗，喺劇中係池子孝嘅妹妹，曾經極度迷戀秦博思，另外最為人記得嘅就係非常鍾意食嘢，而鍾凱琪又真係同今個星期嘅「美女飯托」事件女主角Karen撞樣﹗令網民不禁開post建議編劇快啲寫個新單元講「美女飯托」，搵池美麗做單元女主角：「幫速熊做速托一定好正﹗」不過根據角色設定佢咁為食，劇情應該會改為：「池美麗會5分鐘食晒d野，之後話返屋企，再呃下個食足11餐﹗」
網友群情洶湧之下，鍾凱琪貼咗一張濃妝日系美女圖回應：「做乜無啦啦各位玩到咁大？要飯托我？好吧，其實我都有試過好多次食飯唔使畀錢嘅經驗嘅，但我真係冇特登叫人請㗎，通常在日本同人傾熟咗，人哋唔知點解會主動幫你買埋單。不過我就好少網上約人出嚟食飯，我諗 如果我用這張圖應該都會同文不符吧哈哈？ ps呢張真係我嚟㗎！！無p圖只有調色。角度的重要性，我是自拍高手！」
+7