粉絲慶祝《畢打自己人》十週年　李綺雯：套劇令大家咁記得好感動

李綺雯（𡃁妹）昨晚（24日）出席恐怖電影《屍殺片場》首映禮，表示自己其實很細膽，雖然經常看完恐怖電影都會發惡夢，卻很喜歡這種緊張、驚嚇和懸疑的感覺。𡃁妹笑指自己與朋友玩鬼屋的時候更會不斷製造效果：「我好似做戲咁係咁尖叫，將個驚嚇感推高啲令自己投入啲，嚇我嘅人又開心啲，同我一齊玩嘅朋友見到我咁驚都會好開心！」她更揚言若作為一個演員需要拍恐怖的場面，頂硬上也絕無問題。

𡃁妹有份拍攝的電視劇《畢打自己人》已經是2008年的作品，近日有粉絲為紀念電視劇10週年自發性在畢打街舉辦聚會，令她非常感動：「無諗過一套劇集可以令到大家咁記得又咁鍾意，又可以聯繫到唔同地方嘅人出嚟見面。」𡃁妹表示自己和一眾劇中演員都有拍攝短片感謝粉絲一直以來對劇集的喜愛。

資深藝人岳華日前於加拿大逝世，𡃁妹表示是在社交網站上才知道這個消息。曾跟岳華合作TVB劇集《守業者》、《情越海岸線》和《張保仔》的𡃁妹大讚他是一位沒架子的好好前輩：「現場佢當然好專業，好好演技，但我哋之後收工又或者去宣傳嘅時候佢會好nice，好玩得。佢有時又會幫我哋影相，例如我做緊司儀嘅時候，佢又會幫我影，之後又會send返啲相畀我哋，而且過時過節佢又會send啲祝福畀我哋。」她對岳華這位好前輩的離去感到很可惜：「希望佢一路好走。」