【開心速遞】Terry為結婚好慳家：只買生活必需品，3餐$100內搞掂

於無綫處境劇《愛．回家之開心速遞》中飾演Terry一角的李偉健，日前（14日）與拍拖15年的圈外女友Bo結束愛情長跑，舉行婚禮，婚宴獲該劇一班演員以及TVB藝人好友拉隊到賀，場面既熱鬧又感動。偉健公開多謝老婆表示：「好多謝佢，肯陪我捱窮，我窮咗咁多年，佢都一直陪喺我身邊，對我不離不棄，支持我，真係好好。」既然老婆咁好，點解他又不早些娶對方？他說：「想儲多啲錢先，希望可以畀到好啲嘅生活太太。」而他原本也沒有預算婚宴可以延開22圍，諗住只擺幾圍同至親食飯就算：「『開心速遞』真係幫咗我好多，令我多咗好多工作，依家都唔係話賺好多錢，但起碼生活無以前咁艱苦。」

其實偉健為了要同老婆結婚，多年來的生活都好慳儉，好努力儲錢，到底Terry有多慳家呢？他說：「我平時除咗去超市買日常生活嘅必需品，基本上都唔會買其他嘢，一日三餐係$100內搞掂，盡量節省開支，用晒啲錢嚟儲。」他如此慳家，當然亦不會有甚麼物質生活享受，難得是他太太從沒有要求過甚麼，即使過時過節又或是有甚麼紀念品，他也不用刻意去買禮物：「一齊食餐好啲嘅慶祝佢已經滿足。」

原來他同老婆拍拖呢15年來，兩人只去了5、6次旅行：「都係頭嗰幾年去過泰國、馬來西亞同台灣，中間有幾年都停咗，因為要留返啲錢嚟出書，係近呢兩、三年先有再去返旅行。」相信對於一眾熱愛去旅行的人來講，真係好難想像無得去旅行的日子怎麼過，甚至完全接受不了。不過偉健的老婆卻是零怨言，對老公的窮一直都好包容和體諒。他現時的經濟狀況和生活已比以前有所改善，他亦希望能夠每年都同太太去一次旅行。他又謂老婆並無講過甚麼令他好感動的承諾，因為已經用行動來支持他了，15年的青春都押上了，難道還不夠嗎？

一齊睇下佢同太太幾咁sweet！