【全民造星】姜濤奪冠成功脫毒　下一步是追回暗戀過的女孩？

ViuTV選秀真人騷《全民造星》昨晚（14日）在九龍灣展貿中心舉行總決賽，最後由大熱門姜濤奪得冠軍，獨得100萬獎金。問完騷一刻最想做咩？姜濤接受《香港01》訪問時笑謂：「我好想食嘢！其實唔係，我想見晒支持我嘅人，多謝佢哋。（你本身都坐定粒六贏冠軍？）其實我好少留意外界話邊個大熱，我初衷係想做一啲香港好少有嘅表演，我冇諗過做呢樣嘢會獲得獎項，所以好多謝大家。」

提到姜濤整晚表現穩定，他謙稱自己仍有不少進步空間：「始於冇一個表演係Perfect。」至於100萬獎金打算點使？姜濤就非常大方：「我有諗過係第一時間請大家食嘢，因為呢個獎唔單止係我嘅，仲有好多之前幫助我嘅人。（肥仔叫你請佢去旅行！）可以吖，真係冇所謂，因為呢100萬唔係屬於我，我都想去旅行放鬆下，但唔知有冇時間！」已接拍劇集《信任的遊戲》和《退休女皇》的他又說：「我諗聽日（15日）未使開工住，但我點都會盡力做好，珍惜每個機會。」

問是否已經與ViuTV簽經理人合約，姜濤指仍未確實，始終《全民造星》剛剛先完結，但自己不是會忘本的人。記者笑指他現時已經「威威豬」，夠晒本錢追那些年暗戀過的女孩，他笑說：「搞好依家啲事先，暫時唔諗感情嘢住，因為好唔容易有咁多人支持我！」記者再笑指她們可能倒追他時，他即暗爽偷笑一下：「唔知喎！男仔一定鍾意多異性追求嘅，但專心依家嘅事先啦！（媽咪想你讀埋書先定發展事業？）佢嘅性格不嬲係唔會阻止又唔會支持，只會想我做我最想做嘅嘢，不過我拎到獎佢都好開心，相信我揀咩會理解我、支持我。」