【詹朗林專訪‧下】人生勝利組遭逢劇變 放緩事業做義工巧遇伯樂
「我04年返香港就開始做金融，30歲前買樓，08年遇上金融海嘯，我又死唔去，同年升Director 呢個位，直到後來發生咗一件大事。」詹朗林說他督信命理，曾有相士批他在 2012 年中秋之後會有兩份工作，他當時很疑惑：「我一路都係得一份工喎。」就在2011年，他的人生遇上連環打擊。原本安份做著金融工作的他，人生遭逢劇變：2月父親去世，4月哥哥患重病，6月媽媽要做手術，8月跟女朋友分手，10月到自己出事。
攝影：梁碧玲
行家趁病挖角 收入大跌
當時詹朗林因為疲勞過度導致出現視力問題，醫生建議做激光矯視，他向公司申請一個星期病假，傳到行家耳中，就在他做手術期間，手下有40多人同時遞辭職信，只剩下10個人。原來被行家高薪挖角，「我12月9日做手術，12月10日朝早，做完手術麻醉藥過後，我仲戴住個護眼罩，好似咸蛋超人一樣，殺上海港城，同挖角嘅老闆同埋辭職嗰班同事講數。」
被摯友出賣 情緒崩潰
由於團隊只剩下10人，他預計未來一年收入也會下跌7成，當時因為臨近稅季，他向銀行借了一筆為數不少的金錢，用來度過「寒冬」。同一時間，他的摯友公司出事，資金周轉不靈，向他借錢，他形容這位朋友是「best friend of life」，二話不說就把整筆借來的錢轉借給他，但他最後失蹤潛逃台灣。
家人及自己連番出事，他都咬緊牙關面對，但被摯友出賣成為「壓倒大象的最後一根稻草」，他終於崩潰。「我2012年頭半年都要食鎮靜劑瞓覺，唔係抑鬱，醫生話我太緊張，心搏過速。」這半年他選擇慢下來，工餘時間去做運動，去玩，去做義工，想清楚自己最想做什麼。
詹朗林說：「我信個天係有安排。」他說命理師指他條命好奇怪，在2012年中秋，會出現突變。自2011年起，他的生命中已經發生過太多事，原本有一個圓滿的家庭，原本事業如日中天，原本情場也得意，原本是一個典型的「人生勝利組」，但後來發生的一切，幾乎奪去他所有，然而，命運似乎另有安排，一步一步地再將他推進娛樂圈。
因緣際會 受電視台監製賞識入行
有一次他做義工，為汶川地震籌款，本來只是幫手義賣，但由於MC 臨時甩底，被臨時拉夫上台做MC，「咁啱有電視台嚟拍，嗰間電視台就係NOW。」當時在場一個NOW的監製覺得他表現不俗，招攬他加入NOW做主持，詹朗林說：「但我有份工喎。」那個監製說只係兼職，頂替其他放假主持，一個星期代班一天。但後來因為表現太好，漸漸通告比其他全職主持更多，他更下定決心入行。
賣樓、犧牲百萬收入來換夢想
當時詹朗林跟母親表示自己想入娛樂圈，「我媽初時有擔心，佢問咁你收入點？你養唔養到自己？層樓點？」母親的說話令他猶疑了一下，他慎重考慮了一個月，帶著更堅定的信念跟母親說：「阿媽，我都係想做娛樂，不過我都擔心我同屋企之後嘅生活，所以我賣咗層樓。」他說自己有照顧屋企的責任，「就算唔食唔使，畀屋企嘅錢一蚊都唔可以少，屋企唔係等我開飯，但呢個係我嘅責任，同埋我都要照顧自己，我賣咗層樓可以多個流動現金。」
加入娛樂圈之後，詹朗林不得不放棄部分來自金融的收入，問他賺少幾多，他笑一笑，比了一個7字的手勢。「唔好話畀我阿媽知，實嚇死佢。」他續說：「做娛樂同金融好唔同，做娛樂，你嘅付出同收獲不成正比，但做金融係手停口停嘅職業，你付出幾多，收入幾多，所以當你抽咗大部份時間做一個付出同收入唔成正比的行業，咁你嘅收入亦必然大跌。所以係睇你願唔願意以收入交換夢想。」
場地提供：囍囍冰室