【短暫的婚姻】蝦頭自爆每段情主動出擊：愛情唔靠自己爭取點得？

蝦頭（楊詩敏）今日（10日）出席舞台劇《短暫的婚姻》記者會。在舞台劇中將會飾演一位律師，蝦頭更為角色做好功課，更稱簡直是人生一大挑戰：「其實我冇做過專業人士㗎，我通常接嘅角色都係比較草根啲，一係就俾人蝦，一係就係蝦蝦霸霸，喜感比較重。」

劇中的角色對感情非常進取，現實中是不是也是這樣？蝦頭自爆從來未被追求過，但每次都是自己主動出擊：「我追佢嘅手法唔會話好主動地話『我而家擺明去追你啦』，但我會成日喺嗰個人身邊出現，然後令佢好留意我。又會識哂佢身邊啲朋友，同佢身邊啲人熟咗，見見吓做咗朋友之後就會喺埋一齊。（咁都幾有機心喎！）愛情，你唔靠自己爭取，點得㗎？你遇到個鐘意嘅人，唔通話『你嚟追我啦！』咁咩？自己要爭取自己想要嘅嘢！」

對於婚姻又有什麼看法？蝦頭稱：「兩個人喺埋一齊係咪一定要一紙婚書去確認我哋嘅關係呢？因為唔喺婚姻制度下我哋都可以一生一世㗎嘛。又或者係我暫時未搵到一個人係會覺得我一定要同佢結婚嘅人。」她說除非突然有了小朋友才會有結婚的念頭：「有小朋友你要填出世紙始終都要有父母嘅名，如果唔係咪變私生子？可能咁就會結婚囉，但最好唔好咁啦！哈哈！」