【嫁到這世界邊端2】腎病人妻靠志偉支付醫藥費：佢係再生父母
TVB真人騷《嫁到這世界邊端2》首個登場的韓國新抱秋仔與Oppa暢勇至死不渝的愛情，相信令唔少觀眾睇到眼濕濕。事實上，當時身患急性腎衰竭嘅秋仔其實身邊唔止得Oppa暢勇這位守護天使，圈中一位地位崇高的大哥亦是她的救命恩人。
秋仔曾為TVB服務
節目中提到秋仔畢業後就加入電視台並成為導演，而這間電視台正正就是TVB，當時秋仔負責的就是遊戲節目《超級無敵獎門人》。「志偉真係救咗我條命！」至今秋仔亦未曾忘記過曾志偉對自己的恩情，她透露：「我病咗之後，有一段時間冇返工，之後開新一輯《獎門人》我就有返工，志偉就話好耐冇見你，你搞緊乜嘢？我就同佢講我病咗。」
專科醫療費曾志偉全包
當時曾志偉得知原來秋仔是患上急性腎衰竭這個大病後，義不容辭馬上為她介紹專科醫生，秋仔透露：「志偉聽到我病，因為佢人面廣都有介紹一個好出名嘅腎科醫生畀我。個醫生喺中環，其實入去睇都至少一千蚊，唔計食藥同抽血。但我都照去睇咗，但睇完醫生冇收我錢。咁我打畀志偉，佢話睇啲咁貴嘅醫生，對我嚟講係一種負擔，叫我安心睇，錢嗰度叫我唔使擔心，咁志偉一直都有幫我畀醫療費。唔止咁，志偉得閒仲會問下個醫生幾時嚟，佢間中都會出現了解下我病情，又會安慰我媽咪！」
【嫁到這世界邊端2】Oppa懶理港女患重病 上演「藍色生死戀」
秋仔稱志偉是「再生父母」
有情有義的曾志偉就這樣默默為秋仔承擔了足足一年的醫療費，直到秋仔遠嫁韓國。秋仔稱曾志偉恍如再生父母，她感恩地說：「好多謝志偉當初二話不說就幫忙。如果冇佢，我依家都未必可以同老公咁快樂地生活。一個咁有影響力嘅人，其實唔一定會幫人，但係佢會用佢有嘅能力去幫助我呢啲小小幕後同事，其實真係好難得，我老公同媽媽都好感謝佢。如果唔係佢，可能我已經唔喺度，所以志偉係救咗我條命。」
公司同事為秋仔籌醫藥費
除了曾志偉不求回報的付出外，秋仔至今亦非常感謝TVB同事們的幫忙，她表示：「頭一年，我病情都好反復，入咗3次ICU，好多嘢可能政府醫院唔知我發生咩事，所以都用咗好多錢睇私家，而且呢啲大病通常都會搵幾個醫生睇比較好。當時保險都claim爆晒，所以都冇錢睇醫生。咁TVB的同事都好好，二話不說幫我去籌款。後尾收到啲籌款，好多未合作嘅藝人都有捐款，我記憶中有楊卓娜。」因為大病，令秋仔感受到人間有情。如今秋仔病情已經穩定，衷心希望她和韓國Oppa可以一直甜蜜幸福！