【後生仔傾吓偈】馮盈盈好揮霍？　一萬蚊book酒店慶生：都值嘅

最新一集《後生仔傾吓偈》以「大學生消費習慣」為題，幾位主持同一眾後生仔齊齊公開自己消費習慣，一半以上後生仔都話花費最多係置裝，而陸浩明就話自己用最多錢在旅遊方面，見佢三五不時同女友Ayan周圍飛就知確係使唔少，同樣係喺旅遊上花費不少嘅FYY就問陸浩明訂酒店預算係幾多，陸浩明話頂盡係三千，更表示：「不過其實都已經好肉痛」

FYY話自己試過最貴用七千元訂一晚酒店：「我覺得如果係為慶祝都值嘅，啊！最貴係一萬蚊晚，因為佢包埋慶祝生日，成個天花板都有氫氣球、窗邊又有happy birthday字體……」講到呢度，陸浩明都忍唔住笑FYY非常浮誇，又指成件事同佢好襯，FYY意猶未盡，繼續回顧萬元之夜，指酒店安排了一大束玫瑰、香檳、蛋糕……就連浴缸都充滿了花瓣，相信FYY當晚同寶寶過得十分溫馨又愉快。FYY見眾人對佢萬元之夜甚感興趣，笑言可以私下話佢哋知係邊間酒店，但陸浩明就即時耍手擰頭，更一而再表示：「你唔好介紹比我。」