【跳躍生命線】劉佩玥懶理與周志文「激嘴」事件 ：我唔係蠢女生

劉佩玥（Moon）今天（7日）出席Tvb台慶劇《跳躍生命線》的宣傳活動，Moon表示又興奮又榮幸：「我由細到大都睇馬德鐘嘅劇大，冇諗過會有一日一齊拍一部劇，仲要我哋劇中係一家人嚟，你睇佢幾靚仔，我覺得係一件好開心嘅事。」Moon的說法是否表示馬德鐘是她的童年回憶？「當然啦，有次好好笑，我揸車去一個地點，巧合地我播緊《酒店風雲》主題曲，然後馬神（馬德鐘）過嚟迎接我時候聽到呢首歌，佢話係回憶呀。所以宜家能夠同佢合作真係好開心，佢肯教我哋又幽默。」

近日網民笑指馬德鐘變樣更笑言與卡通人物胡迪撞樣，對於此事Moon說到每一個人在不同年紀也有不同變化是正常：「我哋知道馬神最近食少咗肉，變咗食素，我覺得係好事，佢去到呢個年紀都有咁正嘅身形同呢個樣貌，更有好好魄力，我覺得應該向佢學習食少啲肉。」

問到Moon早前參與遊船河被拍到疑似與周志文「激嘴」的事情，Moon直言不是太關注這件事情：「我自己就唔係好關注喇，第一件事就係成日傳同佢（周志文）啦，我覺得呢件事都幾postive，唔係再傳其他人，剩係傳佢啫，都幾好，其他緋聞唔再擺喺我身上，第二我唔係一個蠢女生，係一個船P有識嘅人同唔識嘅人，雖然親吻人人都做得，但我唔會蠢到人哋開Live做呢件事。」