馮盈盈最憎聽到男友講嘅一句話　「你做嘢其實都唔係好辛苦啫！」

說話從來都是一種藝術，而大家同另一半相處時，就更加要小心講說話，以免傷到彼此的感情。早前就有網民開post討論：「一人一句另一半對你講過最hurt嘅說話」，相信任何有拍過拖的人都一定會有聽過。馮盈盈 (Crystal) 同男友寶寶拍拖以來雖然一直都好甜蜜，但作為一對正常的情侶，難免會有講說話hurt到對方的時候，Crystal聽過寶寶最hust她的說話又是甚麼呢？

Crystal表示：「記得喺我主持《後生仔傾吓偈》初期嘅時候，咁有好多新聞同feedback，寶寶就想安慰我同埋畀啲善意嘅意見我，當中佢講咗一句話『其實你keep住咁真性情呢，好可能無人會鍾意你㗎。』咁嗰下其實我都覺得有啲hurt嘅，因為會覺得就算全世界唔支持我都唔緊要，但係自己身邊最親嘅人，原來都有啲唔係好支持我所做嘅嘢，咁係有啲傷心嘅。」

而Crystal最憎就是聽到寶寶話她：「你做嘢其實都唔係好辛苦啫！」她說：「其實都合理嘅，對於圈外人嚟講，可能會覺得演藝事業並無想像中，同無實際上咁辛苦嘅。寶寶會話『你返到去都係坐喺度畀人化妝set頭，就算拍嘢好多時都係等埋位，埋位做幾個鏡頭又可以抖下喇，咁樣輕輕鬆鬆又一日啦』，但係佢唔明其實拍劇時演員嘅精神壓力有幾大。」

正所謂有來有往，Crystal當然都講過一些好hurt寶寶的說話，而最hurt的一句就係：「有陣時嗌交大家爭執起上嚟，我火遮眼時就會同寶寶講一啲同我拍劇，演情侶有對手戲嘅男演員，話『阿邊個邊個都好過你啦！』有時係無意又或者係有心激佢又好，我都會咁講，呢下其實係最hurt到佢。因為圈外人會覺得行內啲男藝人個個都型英帥靚正，佢會好擔心我同啲對手會日久生情，但有啲位我仲特登咁樣講呢啲嘢嚟激佢，真係好刺激到佢嘅情緒，我都覺得呢啲玩笑係過份咗啲嘅。」而Crystal的底線就是同男友點嗌交都好，都千其唔好隨便嗌分手。

FYY咁靚女，又難怪佢男友會擔心佢變心嘅~